بابا ده العمود الأسبوعى بتاعك (شعاع) بس مش انت اللى كتبته المرة دى عمو أحمد هو اللى كتبه عشان انت مش موجود عشان تكتبه وده آخر شعاع
وده أستاذ جابر القرموطى فى برنامج مانشيت يوم 23/1/2014
.jpg)
أنا مش عارف أنا بكتب ليه الكلام ده بس أنا فيه كلام كتير عايز اقوله ليك وعنك يا بابا
عارف إحساس الأمان لما تفقده وتبقى مُطالب إنك تبقى باعث للأمان
أهو بابا كان خط الدفاع الأخير فى حياتى مهما كنت متصور إنى متحكم فى حياتى
إسماعيل بدر انت كل حياتنا أنا وأختى وماما
كنت موجود فى كل تفصيلة
بابا انت كنت المنسق العام لشئون البيت والأسرة كنا نيجى نرمى عليك همومنا ومشاكلنا كلنا وننام مطمنين انت فيه حد هيحللنا مشاكلنا
بابا وأنا فى المحكمة قابلت كذا موظف بيروقراطى افتكرت انى كنت ممكن أزعق واتخانق بس على حس انك موجود وانى مهما عكيت أو غلطت انت هتغطى عليا وتحمينى
بابا انت كنت بتعمل كل حاجة من قبل مانفكر فيها كنت تيجى وتقولنا أنا دفعت كذا وكذا وكذا وحجزلتك يا محمد الكورس كذا وصلحت العربية وحطلت فيها بنزين عشان وانت رايح بكرة ماتتعطلش فى وقفة البنزين
كنت بتنزل تشترى كل احتياجات البيت
كنت بتصحى كل يوم بدرى قبلينا كلنا عشان تصحينا واحد واحد فى ميعاده وتعلمنا الفطار وممكن تكون اصلا أخر واحد بينزل بس بتصحى قبل ميعادك عشان تطمن علينا وتريحنا
كان اسعد يوم فى المدرسة لما كنت تيجى تاخدنى فى اخر اليوم وبتشيل عنى الشنطة واحنا مروحين
بابا انا كنت عايش حياتى بالطول والعرض بغلط براحتى على اساس انك فى ضهرى دايما وهتصلح ورايا
فاكر يا بابا لما كنت بعمل مصايب وأنا صغير وبقولك انت وتدارى عليا عشان ماما متزعلش
بابا أنا متخيلتش انك هتسيبنى بالسرعة دى أنا كنت متصور مستقبلى فى شكل صور فوتوغرافية وانت كنت فى كل صورة لأ انت اللى كنت بتصنع الصورة
فاكر يابابا لما كنا بنهزر وتقولى هتجوز البت مريم للواد عمر
انت كنت بتحب عمر أووووى وفاكر لما أنا اتقمصت منك وقولتلك : (اعتبرنى عمر يا سمعة؟!) روحت انت حاضنى جامد وقلتلى انت حبيبى يا مودى وربنا
طيب فاكر لما كنت كل يوم بليل تخش عليا الأوضة وأنا بذاكر وتفضلى تسألنى أعملك شاى قهوة وتجيبلى العصير والفاكهة متقطعة فى طبق لغاية عندى
طيب فاكر لما كنت اقول أنا جعان بليل تقوم من نومك تعمل العشا وتنده عليا أجى أكل عالجاهز
طيب فاكر السندوتشات اللى كنت بتعملهالى وأنا رايح المدرسة
عمرك ماغصبتنى على حاجة كان نفسك أفكس لهندسة دى وأدرس بيزنس بس سيبتنى براحتى ادخل اللى كان على مزاجى
طول عمرك حنين علينا كلنا
بابا انت أفضل مثال للعطاء بلا حدود شوفته فى حياتى
بابا فاكر لما جبتلى 2 سويت شيرت ليلة رأس السنة وواحد مطلعش على مقاسى نزلت غيرتهم وطلعت تانى
الفرحة اللى فى عينك وأنا بقيس اللبس اللى بتجبهولى مش قادر أنساها
بابا فاكر لما كنت بدون أى مقدمات وأو أى داع أو مناسبة بتقولى (أنا بحبك أوى يا محمد!!)
احنا كنا كل همك ووقتك ودماغك لينا على طول وبتفكرلنا وتخططلنا واحنا مش شاغلين بالنا بحاجة
بابا أنا فاكر لما دخلت عليك لقيت عينك بتدمع لما عرفت ان جالى العصب السابع يا حبيبى
فاكر لما كنت تاخدنى معاك تفسحنى وتفضل تجيبلى حاجات حلوة كتير وماما تزعق عشان سنانى
انت كنت لما تتعب مترضاش تقولنا عشان منزعلش أو ننشغل عليك
بابا أنا استحالة أسد مكانك فى حياتنى ولو حاولت مين هيسد مكانى فى حياتى؟!!!
البيت مالوش حس من غيرك انت اللى عاملنا صوت وحس
انت طول عمرك بتحاول تربى فيا أعتمد على نفسى بس كان ممكن أعتمد على نفسى وانت موجود جنبى برده تحمينى
الكلام فيك وعنك مبيخلصش بس انت كنت أجمل نعمة ربنا رزقنا بيها أنا وهدير وماما وعمر بس ياريتها دامت أكيد وجودك كان هيخلى حياتنا أحلى
الحياة اتغيرت من بعدك هتستمر بس كانت هتستمر أفضل بوجودك
بابا وحشتنى فعلا وزيارتك ليا فى الأحلام مش كفاية امتى يجى اليوم اللى نتقابل فيه تانى....
أكيد لسة الكتابة مستمرة
15مارس 2014
بابا أنا حلمت بيك امبارح وسألتك انت عايش ولاميت؟
فقولتلى عايش وأنا مكنتش مصدق فقولتلى حتى المسنى مسكت ايدك واتأكدت انك عايش.
#إسماعيل_بدر
